«Өлкән агайга»

ЮНЕСКОга кергән Сабантуе 
Колач җәйде ерак-еракка -
Сахалиннан - Татар Бугазыннан 
Үтеп китте Калининградка.

Бу уңайдан миннән сиңа сүз бар, 
Дөнья таный татар кемлеген, 
Ул татарны син талкыма инде, 
Саклыйм дисәң илең үзлеген.

Йөз ел элек Шагыйрь хак бәяне 
Бирде аңа (раслый тормыш та!) 
Ул тынычта аттан артык эшли, 
Юлбарыстай көчле - сугышта.

Союз юкка чыккач ирек алган 
Тугандашлар, әнә, чит-ятлар, 
Алай-болай (Ходай күрсәтмәсен!) 
Афәт килсә илне кем яклар? 
Бөтенлеген федерациянең 
Татарлардан башка кем саклар?

Татар Олимпиясе!

Сабан туе - Сабантуй, 
Борынгыдан калган туй, 
Безнең халык ОЛИМПИЯ 
Җиңүләрен яулар туй.

Язгы эшләр тәмамлангач, 
Җәй башында бер ямь ул. 
Сабан туе халык белән 
Бергә туган бәйрәм ул..

Кайчан туган? Кайда туган? 
Әйтми аны беркем дә. 
Әллә башта грекларда, 
Әллә әвән төркидә.

Ат чабышу, бил алышу, 
Көч сынашу электән 
Татарларның йөрәгеннән 
Җегәренә береккән.

Капчык белән сугышулар, 
Капчык киеп йөгерү, 
Кырны-юлны күзәтергә 
Колгаларга меңгерү.

Болар бар да зарур булган 
Саклар өчен яшәүне. 
Әнә шулай ил сакларга
 Өйрәткәннәр яшьләрне.

Шул уеннар дәвам итә 
Авыл Сабан туенда. 
Түбән Чаллы авылында 
Чал Калатау буенда.

Дөньяга бер юл

Күпме кеше җир йөзендә, 
Җир-әнкәне уртак өй, диләр. 
Уртак өйдә, уртак һава сулап, 
Бер туфракка басып йөриләр.

Адәм белән Һава тарафыннан 
Яратылган җаннар инде без. 
Бер Аллага юкса табынабыз, 
Ә нигә соң төрле динебез?

Ә нигә соң төрле динебез дә, 
Төрле-төрле сөйләр телебез! 
Уртак өйдә уртак тел дә булса, 
Тату яшәр идек үзебез.

Бер үк телдә дөрес уйлар белән 
Гомер итсәк уртак фикердә, 
Сугышларсыз, ызгышларсыз яшәү 
Мөмкин булыр иде бу җирдә.

Ул вакытта кирәк булмас иде 
Солдатлар да, генераллар да, 
Күпме байлык янга калыр иде 
Эш коралы гына булганда.

Фани дөнья җәннәт булыр иде 
Бер үк дингә халык табынса. 
Акыллылар гадел сайлап куйган 
Хак хаким дөньяга баш булса.

Глобальләшү авыр булыр кебек 
Эсперанто бер тел булмаса. 
Аннан кирәк бер дин, аннан гына 
Бер Ил була алыр лабаса.

Барыбыз да бәхет татыр иде, 
Барыбыз да хаклы бәхеткә. 
Барыбыз да бер Аллаһ бәндәсе, 
Барыбыз да лаек Бәхеткә.