ИГЕЛЕК

Иртәгә димә, соң булыр, 
Син бүген үк эшләп кал: 
Халык белмәсә, балык белер, 
Изгелек кыл да суга сал.

Игелекле һәр мизгелнең 
Кадере чиксез - белче син. 
Йолдыз сүнсә дә, нурлары 
Килеп җитә - күрче син.

МИЛЛӘТ ДИСӘМ

Милләт дисәм, миләр кайный, 
Халык дисәм, сызлый җаннар. 
Телем көрмәкләнә дисәм, 
Йөрәккә укмаша каннар.

Ил-көнемә якты нурлар 
Илтсен минем туры юлым. 
Кайтсын, кайтсын иманына 
һәрбер кызың, һәрбер улың.