Мәгъсүм Хәмит улы Хуҗин 1930 елның 15 маенда Татарстан АССРның Саба районы Тенеки авылында колхозчы гаиләсендә туган. 1948 елда Саба урта мәктәбен тәмамлаганнан соң, бераз вакыт шул ук мәктәпнең башлангыч классларында укытучы булып эшли. 1949 елның январенда аны комсомолның Саба район комитетына икенче секретарь итеп сайлыйлар. 1949—1954 елларда В. И. Ульянов-Ленин исемендәге Казан дәүләт университетының татар теле һәм әдәбияты бүлегендә укый. 1954 елдан алып 1956 елның октябренә кадәр республика комсомол газетасы «Татарстан яшьләре» редакциясендә башта әдәбият-сәнгать бүлеге мөдире, аннан пропаганда һәм агитаңия бүлегендә әдәби сотрудник һәм мөдир вазифаларын башкара. 1956 елда ВЛКСМның Үзәк Комитеты каршындагы бер еллык комсомол мәктәбен тәмамлап кайткач, аны «Татарстан яшьләре» газетасының җаваплы секретаре итеп билгелиләр. 1958—1959 елларда үз теләге белән Казакъстанга китеп, чирәм җирләрне күтәрүдә актив катнаша, бер елга якын Караганда шәһәрендә чыга торган яшьләр газетасы «Комсомолец Караганды» редакциясендә әдәби хезмәткәр булып эшли. 1959—1969 еллар арасында ул «Колхоз байрагы» исемле Саба район газетасында — хатлар һәм авыл хуҗалыгы бүлекләре мөдире, «Коммунизмга» исемле Арча район газетасында — җаваплы секретарь, «Хезмәт» исемле Балтач район газетасында редактор була. 1969 елның октябреннән бирле М. Хуҗин — татар сатирик «Чаян» журналының җаваплы секретаре хезмәтен башкара.
М. Хуҗин 1962 елда КПСС сафларына кабул ителә.

М. Хуҗин проза жанрында иҗат итә. Беренче хикәяләре көндәлек матбугат битләрендә, күмәк җыентыкларда илленче еллар башыннан ук күренә башлый, ә «Ерганак юл яра» исемле тәүге китабы 1961 елда дөнья күрә. Ул, хикәяче буларак, китаптан китапка үсә бара. Аның иң әйбәт хикәяләрендә авыл тормышы, бигрәк тә авыл балалары дөньясы ышандыргыч деталь-образлар аша фәлсәфи һәм психологик планда сурәтләмә, геройларның уй-кичерешләре, теләк-максатлары заманча яңгырашлы ситуацияләр һәм мөнәсәбәтләр аркылы ачыла.

1984 елда М. Хуҗинның «Өч каен ышыгы» исемле яңа хикәяләре тупланган китабы басылып чыкты.

М. Хуҗин—1980 елдан СССР Язучылар союзы члены.

©"Совет Татарстаны язучылары" китабыннан файдаланылды (Даутов Р.Н., Нуруллина Н.Б. Совет Татарстаны язучылары. – Казан, Татарстан китап нәшрияты, 1986)