* * *
Алмаларда бугай, алмаларда 
Матурлыгы алтын көзләрнең...
Алмаларда бугай, алмаларда 
Матурлыгы алтын көзләрнең! 
Алмагачлар - сылу көз кызлары, 
Явын ала, ала күзләрнең. 
Алмаларда бугай, алмаларда 
Авырлыгы юмарт көзләрнең. 
Ширбәт кенә, сусыл агачлары 
Ничек күтәрәдер үзләрен?! 
Алмаларда бугай, алмаларда 
Хуш исләре көләч көзләрнең. 
Алма исе аңкый көзге таңнан, 
Алма исе - назы җилләрнең. 
Алмаларда бугай, алмаларда 
Сагыш, моңы шигъри көзләрнең. 
Кулым бармый, 
Алмаларны түгел, 
Гүя көзнең җанын өзәм мин.

* * *
Алма бакчасында чибәр 
Кызлар алма җыялар. 
Картәниләр, бер сый булыр, 
Алма кагы коялар. 
Алмасы биг(е)рәк матурмы, 
Әллә кызлары микән? 
Белсәң иде, ник егетләр 
Бакча юлында икән.
Алма бакчасында гына 
Егетләрнең күзләре. 
Алма биргәч тә китә алмый, 
Бетми генә сүзләре. 
Алма тулы сөю хисе, 
Вәгъдәләшеп куялар. 
Картәниләр, туйга диеп, 
Алма кагы коялар.

* * *
Кәрзин-кәрзин уңыш...
Көзге байлык!
Ишелеп тә уңды бу алма.
Муллык-шатлык, тик алмагач кына
Көч-хәл белән генә тын ала.
Алмалары шундый тәмле, баллы,
Кайсы кызыл, кайсы сап-сары...
Бетте яшәү суты -
Сынды агач...
Ишетелмәде дә аһ-зары.
Кинәт килгән кара кайгыларны
Җиңеп була, була икән ул.
Ә бәхеткә кайчак, шатлыкларга
Түзеп булмый, булмый икән ул.
Бирешмәгән иде салкыннарга
Ничә еллар, ачы җилләргә...
...Ак чәчкәле чагы күңелләрдә,
Алмалары тәме телләрдә.

КӨЗНЕ ТОЮ
Җәен җәй дә,
Җәй дә түгел инде,
Әллә нинди моңсу бер ара.
Яшел моңын үтеп барган жәйнеа
Кайтарырга кабат юк чара.
Җәй дә түгел инде,
Көз дә түгел,
Тик көзләргә инде күп калмый.
Яфрак кою өчен җил көй яза.
Миләш куакларын ут ялмын.
Көз түгел дә...
Күңел әллә ничек,
Сизә-тоя - инде җәй узган.
Битләүләргә, каен иңнәренә
Имин микән? Нинди? Көз кунган.
Җәйләр белән көзләр арасында
Каз булганнар нәни бәбкәләр.
«Яренгә дә үстерергә язсын», -
Теләк тели газиз әнкәйләр.
Җәен җәй дә,
Җәй дә түгел инде,
Әллә нинди моңсу бер ара.
Яшел моңын түгеп, безнең җәйләр
Гомер көзләренә кереп бара.

* * *
Китәләр... 
Хушлашып, 
Торналар юл алды. 
Болытка эленеп, 
Һавада моң калды. 
Яңгырга кушылып 
Моң ява күкләрдән. 
Учыма җыям да 
Моң эчәм төннәрдә. 
Киткәннәр сагышы, 
Торналар тавышы... 
Җанымнан үтә күк 
Гомерләр агышы...

*  * *
Җәяүле жил көзге яфракларга,
Агачларга килеп кагыла.
Яфрак жыеп йөри нәни бер кыз...
Көз моң булып җанга сарыла.
	Сайлап ала сары, кызылларын, 
	Күзләрендә күпме соклану! 
	Яфрак түгел, гүя бәхет кошын 
	Күкрәгенә кысып тоткан ул.
Җәяүле җил.
Аллы-гөлле яфрак...
Табигать һәм кеше - аһәңлегең,
Бөтенлегең шушы түгелме?