| |
Шагыйрь Рәмис Аймәт (Рәмис Кыям улы Аймәтев) 1968 елның 4 октябрендә Татарстанның Чүпрәле районы Мунчали (Мунчалы) авылында колхозчы гаиләсендә туа. Бала чактан ук хисчән булып, табигать манзараларына сокланып, тормыш ямен җаны белән тоеп, сихри өмет-хыялларга, шигырьгә-җырга табынып үсә. Урта мәктәпне тәмамлагач та, ул, күңел дөньясы ихтыяҗына буйсынып, 1986 елда Казанга килә һәм Казан дәүләт университетының татар теле һәм әдәбияты бүлегенә укырга керә. Студент елларында ук шигъри иҗат белән ныклап шөгыльләнә башлый, көндәлек матбугатта беренче шигырьләрен бастыра. «Казан утлары», «Идел» кебек абруйлы журналларда шигъри цикллары дөнья күреп, зур өмет уяткан каләм иясе буларак әдәби җәмәгатьчелекнең игътибарын үзенә тарта. Яшь шагыйрьнең 2000 елда «Шомырт салкыннары» исемле беренче җыентыгы басылып чыга һәм көндәлек матбугатта югары бәя ала (Лена Шагыйрьҗан, Рафаэль Мостафин, Флера Гыйззәтуллина мәкаләләре).
Университетны тәмамлаганнан соң, Р.Аймәт биш-алты ел чамасы газета редакцияләрендә («Мәгърифәт», «Шәһри Казан») хәбәрче, мәдәният бүлеге, әдәбият бүлеге мөдире, җаваплы сәркәтип вазифаларын башкара, 1995-1998 елларда Татарстан Язучылар берлегендә рәис ярдәмчесе сыйфатында да берникадәр вакыт эшләп ала. 1998-2002 елларда Р.Аймәт — Шәриф Камал музееның директоры. Бу эш урынында ул үзен оста оештыручы итеп таныта, әдәби кичәләр, язучыларның укучылар белән очрашуларын, юбилейларын уздыруны төп мәдәни чараларның берсенә әйләндерә, музейның бинасын ремонтлау, мәйданын киңәйтү юнәлешендә нәтиҗәле эшләр башкара. 2002 елдан ул — Габдулла Тукайның Казандагы әдәби музее директоры.
2005 елда Р.Аймәтнең «Мәгариф» нәшриятында «Айның аръягында» исемле яңа шигъри җыентыгы басылып чыга.
Р.Аймәт — 2001 елдан Татарстан Язучылар берлеге әгъзасы.
ТӨП БАСМА КИТАПЛАРЫ
Шомырт салкыннары: шигырьләр. — Казан: Мәгариф, 2000. — 1106. — 2000 д.
Айның аръягында: шигырьләр. — Казан: Мәгариф, 2005. — 191 б. —1000 д.
ИҖАТЫ ТУРЫНДА
Әхмәдуллина Э. Бу китап — җанга бүләк // Шәһри Казан. — 2001. — 9 февр.
Шагыйрьҗан Л. Үз йөрәге аша // Мәдәни җомга. — 2002. — 19 июль.
Мостафин Р. Моңлы яктылык // Мәдәни җомга. — 2002. — 19 июль.
Гыйззәтуллина Ф. Халык язмышына төбәлеп... // Мәдәни җомга. — 2002.— 19 июль.
Гайнетдин М. «Иблис каһәрләгән язмыштан...» // М.Гайнетдин. Гасырлар мирасы. — Казан: Татар. кит. нәшр., 2004. — 307-318 б.
Фәйзуллин Р. «Чикле чиксезлек» // Казан утлары. — 2005. — № 2. — 140-142 б.
Вәлиулла И. Буыннар чылбыры өзелмәс... // И.Вәлиулла, һәр шагыйрь — бер дәрья... — Казан: Татар. кит. нәшр., 2006. — 177-189 б.
Әдипләребез. Биобиблиографик белешмәлек. Казан,
Татарстан китап нәшрияты, 2009
|
Алгы бит
